بت من ورق

هوي يا الحبيب احسن عيونك فتحن و نشف غبار الجامعات الكتحن
عبرات هواي لو سدسدن حلقك تحن لي زول سواي ما تنحنحن و انا اصلي عارفك ما بتحن
ليه العوينات البيريدنك تخونن تجرحن
ليه بالدموع و النوح مع الناس تفضحن
و انا ديما ياسال ربي انو الطالبات يسمحن
الطالبات يسمحن و يفرحن
و بالخير تملي يصبحن
و لو في مشيهن لكلكن يصلحن
بس لو ظهر كاشف رقم لا يصافحهن لا ينجحن
هو شنو الفضل في الدنيا شان الناس تزاكر و تمتحن
بس نبرا من عيشه الفقر
نبرا من عيشه الفقر
و سمح السكات الفي خشم سيدو
و كمان سمح الصبر
مادام في مدرسه مدرسه
و اساتذه خصيصين نجاح
و حصص صباح و دروس عصر
حانسوي ايه حاندق جرس اخر فصل
او ننفصل نتلم نشوف باقي العمر
ما واضحه زي عين الشمس
واضحه كان هسي و امس
و اصلي مارق يا ضنى
اصلي مااارق يا ضنى
من غنوتي الانا مدمنا
من بلوتي و سلواي انا
من قصه لا بتاكلنا عيش لا تفر جبين هذا العنا
من شده فارده الارتخا و متمكنه بين ممكنه و ما ممكنه
و ايه لزوم يعني القصيد وكتين تموت العاطفه
وكتين نعدل فكرتو و حروفو زاتا نلونا
وكتين نغتغت مهجتو و ندس عيونو و ندفنا
و ايه لزوم يعني الشعر الما عرف معناو ولا شيتا عنا
ابقا مارق يا جنا
كان من هناك او من هنا
كان منهم او مننا
من مزامير التوحس و الغنا
من صباحات الهواجس و من طوابير المدارس
و من مروق الروح
و امرق من متاهات النفس
ما واضحه زي عين الشمس
واضحه في كل الجرايد و القصايد
و المعابد و المصانع و الشوارع
لما دون نشعر نحس
و لما دون خاطر يمر
واضحه انو سكات و مقدود من دبر
و كلام و مقدود من دبر
و ضمير و مقدود من دبر
و قميص و مقدود من دبر
لكن منو البيشهد عليك يا بت مدام كلك عزر
يا بت مدام عرفوكي جد بتخافي من ضل الضحى
و من بشرة الناس السمر
و يؤسفنا جدا اننا
يوسفنا اسود مننا
و محنية ضهرو من الكبر
و عرفوكي جد بتخافي من ضل الضحى
و من ضحكه الناس السمر
عرفوكي بس هم ما اظن فهمو العيون السمحه فيك كانت شتر
و يسلم ضراع الطين
و قدح المونة
جيتة امونة
حر الواطه وادة صحونا
للولد البيشيل طوريتو سباك الفجر
و تضيع سنين العمر ليه في المدرسه
المدرسه الما بتجبر الخاطر اذا
المدرسه الما بتستر الحال بكرة ما بتملالنا فد شوال تمر
و ايه لزوم يعني الدفاتر
و المحابر
و الشنط
و الارديه
و الدق
و درس اليوم
و حلق الراس
و قليم الضفر
اييييييييييييييييييه يا سنين المدرسة
سبتيلنا ايه يا مدرسة
دي الجامعه لسع فيها ناس
بتحب بعض..
و تلبس بعض
و تاكل بعض
و تقوم بعض
و تقعد بعض
و تـ
منو العوض و ليو العوض
و في ناس كمان تجمع ورق فاضي و تمر
تنجح فشل
تسرق حصاد غيرا و تمر
و كتير في ناس بتفط سطر
يا شعب اصحى كفاك شقى
و كفاك خطاك على الجمر
لي متين حا نحلم بالغنا
لمتين نعدي من الضياع
و الفرقه و الحرقه و نمر
و سمح السكات الفي خشم سيدو
و كمان سمح الصبر
و الدنيا ما زالت بخير و الدنيا ما زالت فقر
و انا زي دراويش العشق
ما سقت خطوات الرحيل
لكن مشيتا و بالجبر
لكن مشيتا و فوق جمر
و حبيبتي قالت لي تعال...
و مرقت من جلدي القديم
و درعت توب الصبينة
و مشيت لها و انا منتهي
سنتين ولا قعدت عيوني مع عيونا اتونسن
لا في الخيال لاقيتا لا لاقتني هي
سنتين ولا بنبدالنا سكة ولا خطانا بنتتهي
سنتين و رغم الابتعاد و العشنا من خوف و ارتعاد
لسع سعاد ..... هي بتستحي
و انا باشتهي .. و انا باستحي
و هي بتشتهي
و ما بين "نعم " و اللقيا كان حرفين نهي
و انا خاطري من كتر الهموم و الساعه خمسة
نسى و سهي .. في الهم غرق
و بي الشوق حرق
و حبيبتي قالت لي تعال
خافت وقت قت ليها شيخ
مسكينه ما عارفه الفرق بين الدراويش و الشيوخ
بين الصفيقات و العرق
بين الغرق و الما غرق
تاريها زي انا يا خلق ..طينة و مطينة بالعشق
و مكتوله لي حد السكات .. و متيمة
.. بس كنت ديما باعلما
انو الحزن زاد الفرح . و الفرحه نفسها مؤلمة
و العافيه اسمح منها لو حتى كانت بلسما
و الشمس في توب من حلال
و القمرة اكبر مجرمة
و كضابه ما بتحلب لبن
القمرة ما بتحلب لبن
و مليانه زيف و مهضلمة
و ممسوخه مهما اتبرجت
ما زي مصابيح السما
و القدرة ما بتنفات شبر
و السترة ميها الكمكمة
و الناس سواسية كالمشط
و الحرة دينا ملجما
و الحلوة ما حلوة طعم
و المرة ربنا قاسما
و القسمة ما بي الايد كمان
الايد هي زاتا مقسمة
اصبع صغير و اصبع كبير
و اصبع وسط و اصبع نضم
و اصبع بيدخل خاتما
وتفرق بدايه الشوق كتير
و كتين تصل للخاتمة
ما الريدة بتشوف بي تحت
و الحب موشح بالعمى
و ما بيفهم النور الا زول عاش في دياجر مظلمة
النجمة ما بتعني الوضوح
و العتمه ميها الهضلمة
الوشمه ما نزفت جروح
و البسمة عزا البفهما
ما النسمة في الصيف لو تفوح
تحرق حشا البيتنسما
و الوجعه باردة على البيبوح
و تسل رويحه البيكتما
و الروح بتمرق ما بتموت
و الجته بتقيم مأتما
نحن انعكاسات للنجوم
و الواطه ضل راميا السما
و انا ما رميت اذا رميت و اي عاشق ما رمى
ضحك المشيب براسه فبكى و نادى سلما
و سمت بغات الطير حين كبا حزينا مرغما
و ريتا معنى القارعة
و عقرو
وربك دمدما
حفظتها الناس
و الفلق
و الحمدو
و الاخلاص
و طه
و لم يكن
و العاديات
و كأنما ما كان في شي
و بعد ده كلو بتنتشي
لا بتستحي و لا بتختشي
و قرمت كرعي بالمشي
وكلمتها
قت ليها اوعه تدقشي
الطيبه ما في كل شي
و ما تهبشي
الجوة خليو جوة فيك
و الما بيخش ما تخششي
و دمع الظنون البيني بينك قشقشي
و الشوق على باب البيريدك وشوشي
ونار النضال جمب الشمس
ما تمشي بي راحتك عليو يا روحي هوي بتشمشي
و لو جاك خريف الوجعة سويلك بيوت في داخلي ابني و عشعشي
و اديني احساس اني شي
و قرمت كرعي بالمشي
و كلمتها
خلي بالك يا بنيه
العمارات البيناطحن و المعاني القرمزية
اوعه تسرق من ملامحك او تغير فيك شويه
ماني شايل هم قرايتك انتي قرايه و ذكية
و ابقي جد يا حلوة فاهمه
ابقي واعيه و كوني حية
اصلو في الجامعه العريضه
و في بيوت الداخلية
في الحبايب
و في القرايب
و في البيقاسموك الاسية
الا برضو خلي بالك هي المصايب مي شوية
العقارب
و الكهارب
و الدبايب
و المصايب
و الف سوسه و الف حية
و انتي سمحه و انتي قمحه و لسه نية
و لو دقستي
و اساليني انا الدقست
و اكلوني السمسمية
في زمنا وحات عيونك
بيدفنوك يا زوله حية
ابقي واظبي على صلاتك
قومي كل ما نادى حيا
و خلي بالك في الشوارع و المسافات القصية
و في مشاوير العصاري
و انتي ساعه المغربيه
و في الحدايق و الكباري
و في الملاهي الاجنبية
و الوليدات الاخيرلك من تصاحبيهم بنيــة
و البنيات البيزلطن وشهن
و البتعمل فيها شيخه
او تقول بتشوفلا طيا
و في القرايه سجم رمادن
ابقي مارقه و ناغمي ليا
مرة تلقى الضمه شده
و مرة تلقى الشده مدة
و عادي تلقا الخمسه مية
و اسمع اسمع
و اسمع اسمع و ياما تسمع
في البيغنن الله ليا
و كر عليا
و جيبو ليا
و نحن يا حليلنا الغلابى
نحنا يا حليلنا الغلابا
بيلعبنبنا كوعلية
و دايرة بيرقر و دايرة شيه
و دايرة طرحه و تيكو ملحه
و دايرة جست و ميج و مسحه
و خصله تايهه و شنطه بطة
و عمو اسرع انقبضت
و زولي نط
و دي المحطه
و هنا لقطه
و هنا بطه
و هي يا هي و تاني هي
عندكم كلب ولا اجي بالدرب
اطفر ولا بتدفر
الماف شنو
ابوك لا راضي لا راضي
كيسك فاضي ولا نمشي القاضي
اشخت شخيت و .......
و في النهاية القصه فكــة
دي الحضارة الدينا فكه
ولاحقه حبوبة امي مكة
و عامله فيها رشيقه حية
مهما نسرخ هيا هيا
و في البتنسى ابوها يقدح
في ضنى ايامو الشقيه
شان هي تقرا و بكرة تنجح
تحيا مستورة و رضية
و في الحليل اماتن يبكن
بي وراهن ووب و حيا
الا هن سجم المحنة
حليل زمنكن يا الرضية
لا فؤدان مرة حنا
ولا طرن بالمرة جية
الشفايف مي شفايف
و الشعر سونلو كية
و بيدن الاسكيرتي شرطه
و تاني فوق الركبه طيا
و بيمرقن ...
احسن اسكت


شدي حيلك يا بنية